অৱসৰৰ পূৰ্বে ছবিত কণ্ঠদান কৰিলে কিমান টকা পাইছিল অৰিজিৎ সিঙে?

নেপথ্য সংগীতৰ পৰা অৱসৰ লোৱাৰ কথা ঘোষণা কৰিছে অৰিজিৎ সিঙে। শেহতীয়াকৈ তেওঁ চলমান খানৰ ছবি “বেটল অৱ গালৱান”ৰ দেশপ্ৰেমমূলক গীত “মাতৃভূমি”ত কণ্ঠদান কৰিছে। ইফালে, গায়কজনৰ নেট ৱৰ্থ আৰু এটা গীতৰ বাবে তেওঁৰ মাচুলৰ বিষয়ে জানিবলৈ সকলো আগ্ৰহী।

অৰিজিৎ সিঙে নেপথ্য সংগীতৰ পৰা অৱসৰ লোৱাৰ কথা ঘোষণা কৰি লাখ লাখ অনুৰাগীৰ হৃদয় ভাঙিছে। ইণ্ডিয়ান আইডলৰ জৰিয়তে টেলিভিছন কেৰিয়াৰ আৰম্ভ কৰি অৰিজিৎ সিঙে তেওঁৰ সুৰীয়া কণ্ঠৰ বাবেই এক বৃহৎ ফেন বেচ গঢ়ি তুলিছিল।

‘দ্য ইকনমিক টাইমছ’ত প্ৰকাশিত এক প্ৰতিবেদন অনুসৰি অৰিজিত সিঙৰ বৰ্তমানৰ সম্পত্তিৰ পৰিমাণ প্ৰায় ৪১৪ কোটি টকা (প্ৰায় ৫ কোটি ডলাৰ)। ভাৰতৰ সৰ্বাধিক দামী গায়ক সকলৰ তালিকাত তেওঁ শীৰ্ষত আছে। প্লেবেকৰ পৰা আৰম্ভ কৰি ষ্টেজ প্ৰগ্ৰাম, ব্ৰেণ্ড এণ্ডাৰছমেণ্ট আৰু গীতৰ ৰয়েল্টিলৈকে তেওঁৰ মুঠ বাৰ্ষিক আয় প্ৰায় ৭০ কোটি টকা।

অৰিজিতে গীত গোৱাৰ বাবে কমেও ৮ৰ পৰা ১০ লাখ টকা লয়। কিছুমান ডাঙৰ প্ৰকল্পৰ বাবে এই সংখ্যা আৰু অধিক বৃদ্ধি পায়। অৱশ্যে তেওঁৰ উপাৰ্জনৰ মূল উৎস হ’ল লাইভ কনচাৰ্ট। সংগীত পৰিচালক মন্টি শৰ্মাৰ সৈতে হোৱা এক সাক্ষাৎকাৰ অনুসৰি অৰিজিতে প্ৰতিটো অনুষ্ঠানৰ বাবে প্ৰায় ২ কোটি টকা লয়। আন কিছুমান সূত্ৰই দাবী কৰিছে যে সম্পূৰ্ণ দুঘণ্টীয়া লাইভ কনচাৰ্টৰ বাবে তেওঁৰ মাচুল প্ৰায় ১৪ কোটি টকা পৰ্যন্ত হয়।

মুম্বাইত অৰিজিতৰ চাৰিটা ফ্লেট আছে, প্ৰত্যেকৰে বজাৰ মূল্য প্ৰায় ৯ কোটি টকা। তেওঁৰ গেৰেজত দামী গাড়ীৰ সংগ্ৰহ আছে। প্ৰায় ২ৰ পৰা ৪ কোটি টকাৰ ৰেঞ্জ ৰভাৰ ভলগৰ উপৰিও তেওঁৰ হাতত আছে হামাৰ এইচ ৩ আৰু মাৰ্চিডিজৰ দৰে বিলাসী গাড়ী।

১৯৮৭ চনত জন্মগ্ৰহণ কৰা শিল্পীগৰাকীয়ে ‘আশিকি ২’ ছবিৰ ‘টুম হি হো’ গীতটোৰ জৰিয়তে নিশাটোৰ ভিতৰতে হিট হৈ পৰে। কেৰিয়াৰত তেওঁ হিন্দী, বাংলা, মাৰাঠী আৰু তেলেগু ভাষাত ৩০০ৰো অধিক গীত গাইছে। শেহতীয়াকৈ তেওঁৰ কণ্ঠই ‘ঘৰ কব আওগে’ (বৰ্ডাৰ ২) বা ‘মাতৃভূমি’ (গালৱান) আদি গীতেৰেও দৰ্শকক মোহিত কৰিছে।