গংগা নদীত কিয় চিতাভস্ম বিসৰ্জন কৰা হয়! এই পৰম্পৰাৰ আঁৰৰ মহত্বৰ বিষয়ে জানেনে?

প্ৰতিনিধিত্বমূলক ছবি

সনাতন ধৰ্মত এগৰাকী ব্যক্তিৰ মৃত্যুৰ পিছত তেওঁৰ অন্ত্যেষ্টিক্ৰিয়া সম্পূৰ্ণ ৰীতি-নীতিৰে সম্পন্ন কৰা হয়। অন্ত্যেষ্টিয়াৰ পিছতো মৃত্যু হোৱা লোকজনৰ পৰিয়ালে বহু নীতি-নয়ম পালন কৰে। এয়া কেৱল এক পৰম্পৰাৰ অংশই নহয়, বৰঞ্চ এয়া এক গভীৰ ধৰ্মীয় অনুষ্ঠান। ব্যক্তিজনৰ অন্তিম সৎকাৰ কৰাৰ পিছত চিতাভস্ম নদীত বিসৰ্জন দিয়া হয়। হিন্দু ধৰ্মীয় লোকসকলৰ মাজত বিশেষকৈ গংগা নদীত চিতাভস্ম দিয়াৰ এক পৰম্পৰা আছে। গংগাত ছাই বিসৰ্জন কৰাটো অতি পবিত্ৰ হিচাপে গণ্য কৰা হয়।

পিছে গংগা নদীত কিয় এইদৰে চিতাভস্ম বিসৰ্জন দিয়া হয়? হাজাৰ হাজাৰ বছৰ ধৰি মানুহে এই পৰম্পৰা অনুসৰণ কৰি গংগাত চিতাভস্ম বিসৰ্জন কৰি থকাৰ আঁৰৰ কাৰণ কি? স্বাভাৱিকতেই এয়া সকলোৰে মনত উদ্ৰেক ঘটিবপৰা এক প্ৰশ্ন। এই বিষয়ে বিতংভাৱে জানো আহক।

গৰুড় পুৰাণৰ বাখ্যা

হিন্দু ধৰ্মৰ ১৮ খন মহান পুৰাণৰ ভিতৰত গৰুড় পুৰাণ অন্যতম। এই গৰুড় পুৰাণত মানুহৰ শৰীৰ আৰু মৃত্যুৰ পিছত আত্মাৰ যাত্ৰাৰ বিষয়ে বিতংভাৱে বৰ্ণনা কৰা হৈছে। গৰুড় পুৰাণৰ মতে মানৱ শৰীৰ পৃথিৱী, জল, অগ্নি, বায়ু আৰু মহাকাশ পাঁচটা মৌলৰে গঠিত। মৃত্যুৰ পিছত শৰীৰ এই পাঁচটা মৌলত দ্ৰৱীভূত হয়।

অন্ত্যেষ্টিক্ৰিয়াৰ সময়ত মৃতদেহটো জুইত উঠাই দিয়া হয়। ইয়াৰ পিছত বাকী থকা হাড় আৰু চিতাভস্ম সংগ্ৰহ কৰি গংগাত ডুবাই দিয়া হয়। গংগাত চিতাভস্ম বিসৰ্জন দিয়াৰ পিছতহে আত্মাই শান্তি লাভ কৰে আৰু তাৰ পিছত স্বৰ্গ যাত্ৰা কৰে বুলি বিশ্বাস কৰা হয়। গংগাত চিতাভস্ম বিসৰ্জন দিলে পাপ দূৰ কৰা হয় বুলিও পুৰাণত উল্লেখ আছে।

গংগা নদী মোক্ষৰ দাতা

বিশ্বাস অনুসৰি ভাগীৰথৰ তপস্যাৰ বাবে গংগা স্বৰ্গৰ পৰা পৃথিৱীলৈ নামি আহিছিল। ভগীৰাথে নিজৰ পূৰ্বপুৰুষক মুক্ত কৰিবলৈ এই কাম কৰিছিল। এই কাৰণে গংগা নদীক মোক্ষৰ দাতা বুলি কোৱা হয়। গংগাত চিতাভস্ম বিসৰ্জন দিলে মৃতকে ব্ৰহ্মলোক পায় বুলিও বিশ্বাস কৰা হয়। আত্মাই সেই স্থান লাভ কৰিলে পুনৰ্জন্মৰ চক্ৰ শেষ হয় আৰু চিৰ শান্তি লাভ কৰে বুলি কোৱা হয়।

বিশেষ দ্ৰষ্টব্যঃ লেখাটোত উল্লিখিত তথ্যসমূহ ধৰ্মীয় তথা লৌক বিশ্বাসৰ ওপৰত ভিত্তি কৰি দিয়া হৈছে। TV9 Assam-এ এই সন্দৰ্ভত নিজা কোনো মত প্ৰকাশ কৰা নাই।