পূজাত ফুল কিয় আগবঢ়োৱা হয় জানেনে? চাওঁ আহক পূজাত ফুলৰ গুৰুত্ব…

পূজাত ফুলৰ ব্যৱহাৰ

হিন্দু ধৰ্মত উপাস্য দেৱ-দেৱীসকলক পূজা কৰাৰ সময়ত আন সামগ্ৰীৰ লগতে ফুল আগবঢ়োৱা হয়। আন শুভ কাৰ্যৰ লগতে দেৱ-দেৱীসকলৰ পূজাত সদায়েই ফুলৰ ব্যৱহাৰ কৰা হয়। এই দৃশ্য স্বাভাৱিকতেই আপোনাৰ দৃষ্টিগোচৰ হৈছে। পিছে কেতিয়াবা ভাবিছেনে, পূজাত এইদৰে ফুল ব্যৱহাৰ কৰাৰ কাৰণ কি? পূজাত ফুলৰ ব্যৱহাৰ কেৱল ঐশ্বৰিক সত্তাৰ প্ৰতি আমাৰ ভক্তি প্ৰকাশৰ উপায় নহয়, ইয়াৰ আন কিছুমান তাৎপৰ্যও আছে। এই বিষয়ে চাওঁ আহক-

ফুলে আৰাধ্য দেৱ-দেৱীৰ মূৰ্তিৰ পৰা সূক্ষ্মতম কণা আকৰ্ষণ কৰিব পাৰে বুলি কোৱা হয়। ই ভক্তসকলৰ মাজত ঈশ্বৰৰ চৈতন্য প্ৰেৰণৰ এক উপায়। পূজাত নিৰ্দিষ্ট সংখ্যক ফুল দেৱ-দেৱীলৈ আগবঢ়োৱা হয়। ইয়াৰ জৰিয়তে দেৱতাৰ পৰা জ্ঞান, আকাংক্ষা আৰু কৰ্ম শক্তি আহৰণ কৰিব পাৰি বুলি বিশ্বাস কৰা হয়। দেৱ-দেৱীক ফুল আগবঢ়োৱাৰ সময়ত সদায় উজ্জ্বল ৰঙৰ সৰু সৰু ফুলৰ পৰা আৰম্ভ কৰিব লাগে আৰু ডাঙৰ বগা ফুলেৰে সামৰণি পেলাব লাগে।

এনে নিয়মৰ দ্বাৰা বস্তুবাদী জগতখনৰ পৰা মুক্ত হোৱাৰ ইঙ্গিত প্ৰকাশ পায় আৰু দেৱতাসকলৰ অপাৰ্থিৱ জগতৰ সৈতে একাত্ম হোৱাত সহায় কৰে। দেৱতালৈ ফুল আগবঢ়োৱাৰ সময়ত ফুলৰ ঠাৰি বা ডালটো সদায় দেৱতাৰ ফালে মুখ কৰি দিব লাগে। ইয়াৰ দ্বাৰা ভক্তসকলে ঈশ্বৰত্বৰ পৰা চৈতন্য গ্ৰহণ কৰিব পাৰে। গোন্ধ, স্পৰ্শ আৰু দৃষ্টিৰ মাধ্যমেৰে ফুলে সাত্ত্বিক তৰংগ লাভৰ উপায় হিচাপে কাম কৰে।

ফুলে ঋণাত্মক শক্তি আৰু কম্পনৰ বিৰুদ্ধে যুঁজিব পাৰে। ই ঐশ্বৰিক নীতিৰ সৈতে মিল থকা কম্পাঙ্কৰ সৃষ্টি কৰে বুলি বিশ্বাস কৰা হয়। পূজাত ফুলৰ এনে গুৰুত্বৰ লগতে কিছুমান উপকাৰিতাও আছে। ফুলৰ পৰা ওলোৱা সুগন্ধিয়ে আমাৰ মন-মেজাজ উন্নত কৰিব পাৰে। ইয়াৰ উপৰিও ই আমাক কৰ্মত মনোনিৱেশ কৰাত সহায় কৰে। বেছিভাগ ফুলৰ ঔষধি মূল্য থাকে। সেয়ে এই ফুলসমূহৰ উপস্থিতিয়ে আমাক কিছুমান ৰোগৰ পৰা আঁতৰাই ৰাখে।

ফুলৰ সুগন্ধিয়ে এৰোমাথেৰাপিৰ ভূমিকা পালন কৰে। পূজাত ফুলৰ ব্যৱহাৰে ঐশ্বৰিক সত্তাৰ সৈতে আমাৰ সংযোগ বৃদ্ধি কৰিব পাৰে। ইয়াৰ উপৰিও ফুলে আমাক বস্তুবাদৰ পৰা মুক্ত হ’বলৈ মনোবল প্ৰদান কৰে। পূজাৰ বাবে পুৱা ফুল ছিঙিব লাগে আৰু ইয়াৰ সহায়ত আমাৰ প্ৰকৃতিৰ সৈতে সংযোগ স্থাপন হয়। ই আমাৰ মনক শান্ত কৰাৰো এক উপায়।