India-China Letter: প্ৰধানমন্ত্ৰী নহয়, ভাৰতৰ ৰাষ্ট্ৰপতিলৈ জিনপিঙৰ গোপন পত্ৰ, ইয়াৰ পাছতে সলনি সকলো, চিঠিখনত কি লিখা আছিল?

ভাৰতৰ ৰাষ্ট্ৰপতিলৈ চীনৰ পৰা আহিল গোপন চিঠি

প্ৰধানমন্ত্ৰীলৈ নহয়, এখন গোপন চিঠি আহিল ৰাষ্ট্ৰপতি দ্ৰৌপদী মুৰ্মুলৈ। কিন্তু বেইজিঙৰ পৰা হঠাৎ অহা চিঠিখনৰ আঁৰত কাৰণ কি আছিল? কোনে পঠিয়াইছে চিঠিখন? সূত্ৰৰ খবৰ অনুসৰি, গালৱান সংঘৰ্ষৰ পাঁচ বছৰৰ পাছত ভাৰত-চীনৰ সম্পৰ্কৰ পৰিৱৰ্তনেই সেই চিঠিৰ আৰম্ভণি।

সূত্ৰ হিচাপে নাম প্ৰকাশ নকৰা ভাৰতীয় এজন বিষয়াৰ উদ্ধৃতি দি এই সন্দৰ্ভত প্ৰতিবেদন প্ৰকাশ কৰিছে আমেৰিকাৰ সংবাদ মাধ্যম ব্লুমবাৰ্গে। প্ৰতিবেদনত কোৱা হৈছে যে, চীনৰ ৰাষ্ট্ৰপতি ছি জিনপিঙে মাৰ্চ মাহত ভাৰতৰ ৰাষ্ট্ৰপতিলৈ এই পত্ৰ প্ৰেৰণ কৰিছিল। পিছত ৰাষ্ট্ৰপতিৰ পৰা প্ৰধানমন্ত্ৰী নৰেন্দ্ৰ মোদীৰ হাতলৈ যায় চিঠিখন। আৰু চিঠিখন প্ৰেৰণ কৰাৰ কেইমাহমান পিছত ভাৰত আৰু চীনে সংঘাতপূৰ্ণ সম্পৰ্কক পিছলৈ থৈ নতুন সম্পৰ্ক গঢ়ি তুলিবলৈ আৰম্ভ কৰিলে।

কিন্তু এটা চিঠিয়ে ৰাতিটোৰ ভিতৰতে সকলো সম্পৰ্ক সলনি কৰিলে নেকি? এইখন কূটনৈতিক পৰ্যায়ৰ এখন গোপন চিঠি। ব্লুমবাৰ্গৰ প্ৰতিবেদন অনুসৰি, কেনেদৰে ভাৰতৰ সৈতে সম্পৰ্ক স্বাভাৱিক হ’ব পাৰে সেই সম্পৰ্কে সেই চিঠিত ছি জিনপিঙে এটা বাৰ্তা দিছিল। কাৰণ আমেৰিকাৰ শুল্ক বাবে ইখনৰ পিছত সিখন দেশ সংকটত পৰিছে। একেদৰে সংকটত পৰিছে ভাৰত-চীন। এই পৰিস্থিতিত বেইজিঙে অনুভৱ কৰিছে যে, চুবুৰীয়া দুয়োখন দেশ ওচৰলৈ অহাটো অতি প্ৰয়োজনীয়।

অৱশ্যে এই প্ৰসংগত ক’ব পাৰি যে, বেইজিঙে এই চিঠিখন পঠোৱাৰ সময়ত ভাৰতৰ ওপৰত শুল্কৰ প্ৰভাৱ নাছিল। ট্ৰাম্পৰ এই আচৰণ আছিল আটাইতকৈ বিশ্বাসযোগ্য বন্ধুৰ দৰে। কিন্তু সময়ে সকলো সলনি কৰিলে। ট্ৰাম্পে সলনি কৰিলে সিদ্ধান্ত। ভাৰতৰ ওপৰত ৫০ শতাংশ শুল্ক আৰোপ কৰে আমেৰিকাই। পিছে ছি জিনপিঙে আগতীয়াকৈ ইয়াৰ আভাস পাইছিল নেকি? সেয়াও এক ৰহস্য!