Small Savings Interest: ক্ষুদ্ৰ সঞ্চয় আঁচনিৰ সুতৰ হাৰৰ ওপৰত ডাঙৰ সিদ্ধান্ত কেন্দ্ৰৰ
ক্ষুদ্ৰ সঞ্চয় আঁচনিৰ সুতৰ হাৰৰ সন্দৰ্ভত ডাঙৰ সিদ্ধান্ত গ্ৰহণ কৰিছে কেন্দ্ৰই। এক অধিসূচনা জাৰি কৰি এই সিদ্ধান্তৰ কথা অৱগত কৰিছে কেন্দ্ৰীয় বিত্ত মন্ত্ৰালয়ে।
প্ৰতীকী ফটো
একেৰাহে ষষ্ঠবাৰৰ বাবে কোনো পৰিৱৰ্তন নহয় ক্ষুদ্ৰ সঞ্চয় আঁচনিৰ সুতৰ হাৰ। এক অধিসূচনা জাৰি কৰি এই সিদ্ধান্তৰ কথা অৱগত কৰিছে কেন্দ্ৰীয় বিত্ত মন্ত্ৰালয়ে। কোৱা হৈছে যে, কেন্দ্ৰীয় ক্ষুদ্ৰ সঞ্চয় আঁচনি, যেনে পিপিএফ, কিষাণ বিকাশৰ দৰে আঁচনিৰ সুতৰ হাৰ বৃদ্ধি বা হ্ৰাস নহয়। অপৰিৱৰ্তিত হৈ থাকিব এই আঁচনিৰ সুতৰ হাৰ।
কেন্দ্ৰীয় বিত্ত মন্ত্ৰালয়ে কয়, “চলিত বিত্তীয় বৰ্ষৰ দ্বিতীয় ত্ৰৈমাসিকৰ বাবে ক্ষুদ্ৰ সঞ্চয় আঁচনিৰ সুতৰ হাৰ অপৰিৱৰ্তিত ৰখাৰ সিদ্ধান্ত লোৱা হৈছে। যিটো মঙলবাৰৰ পৰা অৰ্থাৎ ১ জুলাইৰ পৰা ৩০ ছেপ্টেম্বৰলৈকে কাৰ্যকৰী হ’ব। এই সময়ছোৱাত কিছুমান সঞ্চয় আঁচনিৰ সুতৰ হাৰৰ কোনো পৰিৱৰ্তন নহয়।”
সাধাৰণতে কেন্দ্ৰীয় চৰকাৰে অনুমোদন দিয়া সঞ্চয় আঁচনিবোৰক ক্ষুদ্ৰ সঞ্চয় আঁচনি বুলি কোৱা হয়। য’ত বিনিয়োগৰ পৰিমাণো সীমিত। তাৰোপৰি সুতৰ হাৰ বৰ বেছি নহয়। স্বাভাৱিকতে কেন্দ্ৰীয় চৰকাৰে নিম্ন মধ্যবিত্ত আৰু দৰিদ্ৰ শ্ৰেণীৰ লোকসকলৰ বাবে বিভিন্ন ক্ষুদ্ৰ সঞ্চয় আঁচনি আনে।
বৰ্তমান ডাকঘৰকে ধৰি চৰকাৰী বেংকৰ জৰিয়তে এই চৰকাৰী সঞ্চয় আঁচনিত বিনিয়োগৰ সুবিধা কৰিব পাৰে। তাৰ ভিতৰত উল্লেখযোগ্য হ’ল- ডাকঘৰৰ সঞ্চয়,পিপিএফ, কিষাণ বিকাশ পত্ৰ, সুকন্যা সমৃদ্ধি যোজনা ইত্যাদি।
সূত্ৰই জনোৱা মতে, কেন্দ্ৰীয় চৰকাৰে শেষবাৰৰ বাবে ২০২৩-২৪ বিত্তীয় বৰ্ষত এই ক্ষুদ্ৰ সঞ্চয় আঁচনিৰ সুতৰ হাৰ সলনি কৰিছিল। চলিত বৰ্ষৰ আৰম্ভণিৰে পৰা ৰিজাৰ্ভ বেংকে পৰ্যায়ক্ৰমে ৰেপো ৰেট ১০০ বেছিক পইণ্ট কৰ্তন কৰি আহিছে। তাৰ পিছত স্বাভাৱিকতে কেন্দ্ৰৰ সুতৰ হাৰ বৃদ্ধি কৰাৰ আশা কৰা হৈছিল। বিশেষজ্ঞসকলৰ মতে সেই আশা আৰু নাই।
বৰ্তমান চৰকাৰী সঞ্চয় আঁচনিৰ সুতৰ হাৰ হৈছে-
ডাকঘৰৰ সঞ্চয় একাউণ্ট ৪ শতাংশ।
ডাকঘৰৰ পুনৰাবৃত্তিমূলক জমা ৬.৭ শতাংশ।
ডাকঘৰৰ মাহিলী আয় আঁচনি ৭.৪ শতাংশ।
পোষ্ট অফিচ টাইম ডিপোজিট (১ বছৰ) ৬.৯ শতাংশ।
পোষ্ট অফিচ টাইম ডিপোজিট (৫ বছৰ) ৭.৫ শতাংশ।
কিষাণ বিকাশ পত্ৰ ৭.৫ শতাংশ।
পিপিএফ ৭.১ শতাংশ।
সুকন্যা সমৃদ্ধি যোজনা ৮.২ শতাংশ।
জ্যেষ্ঠ নাগৰিক সঞ্চয় আঁচনি ৮.২ শতাংশ।