পূজাৰ পূৰ্বে দাম কমিব নেকি খাদ্য সামগ্ৰী আৰু কাপোৰৰ? শীঘ্ৰেই হ’ব পাৰে ঘোষণা!

পূজাৰ পূৰ্বে চৰকাৰে দিব নেকি সুখবৰ!

যোৱা ১৫ আগষ্টত দেশৰ স্বাধীনতা দিৱসৰ দিনটোত লালকিল্লাৰ পৰা দেশবাসীক সম্বোধন কৰিছিল প্ৰধানমন্ত্ৰী নৰেন্দ্ৰ মোদীয়ে। নিজ ভাষণত প্ৰধানমন্ত্ৰী মোদীয়ে আন বহু দিশৰ লগতে জি এছ টিৰ আমূল সংস্কাৰৰ কথাও ঘোষণা কৰিছিল। ইফালে যোৱা ২০ আৰু ২১ আগষ্টত দিল্লীত এখন বৈঠকো অনুষ্ঠিত হৈছিল। এই বৈঠকত জি এছ টিৰ ১২ শতাংশ আৰু ২৮ শতাংশ স্তৰৰ বিলুপ্তি সন্দৰ্ভত ইতিবাচক আলোচনা হোৱা বুলি প্ৰকাশ পাইছে।

প্ৰকাশিত খবৰৰ দৰেই যদি এছ টিৰ ১২ শতাংশ আৰু ২৮ শতাংশ স্তৰৰ বিলুপ্তি ঘটে, তেতিয়া ভৱিষ্যতে মাত্ৰ ৫ শতাংশ আৰু ১৮ শতাংশ জি এছ টিহে বলবৎ হ’ব। তথ্য অনুসৰি এই আলোচনাৰ সময়ত চৰকাৰে বস্ত্ৰ উদ্যোগ আৰু খাদ্য সামগ্ৰীৰ ওপৰত ৫ শতাংশ জি এছ টি আৰোপ কৰাৰ সিদ্ধান্ত লৈছে।

বিত্ত মন্ত্ৰালয়ৰ মতে, জি এছ টিৰ এই নতুন গাঁথনিয়ে কেন্দ্ৰীয় চৰকাৰ আৰু ৰাজ্য চৰকাৰৰ ৰাজহ সংগ্ৰহ কিছু পৰিমাণে হ্ৰাস কৰিব। ইফালে কেন্দ্ৰীয় বিত্তমন্ত্ৰী নিৰ্মলা সীতাৰমনৰ নেতৃত্বত অহা ৩ আৰু ৪ ছেপ্টেম্বৰত জি এছ টি পৰিষদৰ ৫৬ সংখ্যক বৈঠক অনুষ্ঠিত হ’ব বুলি জানিব পৰা গৈছে।

তাৰ পূৰ্বে ২ ছেপ্টেম্বৰত জি এছ টিৰ বিষয়াসকলৰ সৈতে আলোচনা হ’ব বুলিও খবৰ প্ৰকাশ পাইছে। সূত্ৰ অনুসৰি, দুৰ্গা পূজাৰ পূৰ্বে এই নতুন জি এছ টি ব্যৱস্থা কাৰ্যকৰী কৰিব পৰা যাব। তেনে অৱস্থাত স্বাভাৱিকতেই উৎসৱৰ বতৰত সাধাৰণ লোকসকলে যথেষ্ট ৰেহাই লাভ কৰিব।

অৱশ্যে প্ৰধানমন্ত্ৰীৰ লালকিল্লা ভাষণৰ প্ৰতি যদি লক্ষ্য কৰা যায়, পূজাৰ পূৰ্বে নতুন জি এছ টি কাৰ্যকৰী হোৱাৰ সম্ভাৱনা কম। এই নতুন জি এছ টি দেৱালীৰ পূৰ্বে কাৰ্যকৰী হ’ব বুলিহে স্বাধীনতা দিৱসৰ ভাষণত ইঙ্গিত দিছিল প্ৰধানমন্ত্ৰী নৰেন্দ্ৰ মোদীয়ে।