চৰ্ত সাপেক্ষে বিৰেন্দ্ৰ প্ৰসাদ বৈশ্যক পুনৰ ৰাজ্যসভাৰ প্ৰাৰ্থীত্ব দিলে অসম গণ পৰিষদে…
পুনৰ বিৰেন্দ্ৰ প্ৰসাদ বৈশ্যৰ নামটো প্ৰাৰ্থী হিচাপে ঘোষণা কৰিছে অগপৰ শীৰ্ষ নেতৃত্বই । কিন্তু চৰ্ত সাপেক্ষে অসম গণ পৰিষদে ঘোষণা কৰিছে প্ৰাৰ্থীৰ নাম । অহা ১৯ জুনত অসমৰ দুখন ৰাজ্যসভাৰ আসনৰ বাবে অনুষ্ঠিত হ'ব নিৰ্বাচন।
বিৰেন্দ্ৰ প্ৰসাদ বৈশ্য
আগন্তুক ৰাজ্যসভাৰ নিৰ্বাচনৰ বাবে প্ৰাৰ্থীৰ নাম ঘোষণা কৰিলে অগপই । পুনৰ বিৰেন্দ্ৰ প্ৰসাদ বৈশ্যৰ নামটো প্ৰাৰ্থী হিচাপে ঘোষণা কৰিছে অগপৰ শীৰ্ষ নেতৃত্বই । কিন্তু চৰ্ত সাপেক্ষে অসম গণ পৰিষদে ঘোষণা কৰিছে প্ৰাৰ্থীৰ নাম । অহা ১৯ জুনত অসমৰ দুখন ৰাজ্যসভাৰ আসনৰ বাবে অনুষ্ঠিত হ’ব নিৰ্বাচন।
এই নিৰ্বাচনৰ বাবে ইতিমধ্যে অসম বিজেপিয়ে প্ৰাৰ্থীৰ নাম ঘোষণা কৰিছে । উল্লেখ্য যে, অসমৰ দুখনৰ এখন আসনত বিজেপিয়ে প্ৰাৰ্থীত্ব দিয়াৰ বিপৰীতে মিত্ৰদল অগপক এখন আসন এৰি দিছে । বৰ্তমানেও এই দুয়োখন আসন অগপ আৰু বিজেপিৰ দখলত আছে । অগপৰ হাতত থকা আসনৰ সাংসদ হিচাপে আছে বিৰেন্দ্ৰ প্ৰসাদ বৈশ্য ।
খবৰ অনুসৰি, ৰাজ্যসভাৰ প্ৰাৰ্থীত্বৰ বাবে অগপৰ মুঠ ২৭ গৰাকী প্ৰাৰ্থীয়ে আবেদন দাখিল কৰিছিল । এই ২৭ গৰাকী প্ৰাৰ্থীৰ ভিতৰত পুনৰ প্ৰাৰ্থীৰ হিচাপে বীৰেন্দ্ৰ প্ৰসাদ বৈশ্যৰ নাম ঘোষণা কৰিছে অগপই । কোৱা হৈছে যে, অভ্যন্তৰীণ বিদ্ৰোহৰ আশংকাত এই সিদ্ধান্ত গ্ৰহণ কৰিছে অগপৰ নেতৃত্বই ।
অগপৰ বিবৃতি
প্ৰাৰ্থীত্বক লৈ শনিবাৰে গুৱাহাটীত অগপৰ শীৰ্ষ নেতৃত্বৰ এখন গুৰুত্বপূৰ্ণ বৈঠক অনুষ্ঠিত হৈছিল । বৈঠকত উপস্থিত আছিল অগপৰ সভাপতি অতুল বৰা, কাৰ্যকৰী সভাপতি কেশৱ মহন্ত আৰু সাংসদ তথা জ্যেষ্ঠ নেতা ফণীভূষণ চৌধুৰীৰ লগতে কেইবাগৰাকী বিষয়ববীয়া ৷
দলীয় সূত্ৰই সদৰী কৰিছে যে, বিশেষ চৰ্ত সাপেক্ষে পুনৰ বিৰেন্দ্ৰ প্ৰসাদ বৈশ্যক প্ৰদান কৰা হৈছে প্ৰাৰ্থীত্ব । সেই চৰ্ত হৈছে দুবছৰৰ পাছতে ৰাজ্যসভাৰ আসনখন এৰি দিব লাগিব বিৰেন্দ্ৰ প্ৰসাদ বৈশ্যই । এই কথাও স্পষ্ট কৰি দিছে যে, পৰৱৰ্তী ৪ বছৰৰ বাবে আসনখন নতুন প্ৰজন্মৰ হাতত তুলি দিয়াৰ সিদ্ধান্ত লৈছে দলটোৱে ।
বৰ্তমান ৰাজ্যসভাৰ এই আসন দুখনত সাংসদ হিচাপে আছে বিৰেন্দ্ৰ প্ৰসাদ বৈশ্য আৰু বিজেপিৰ মিছন ৰঞ্জন দাস । এই দুয়োগৰাকী সাংসদৰ কাৰ্যকাল অন্ত পৰাৰ পৰিপ্ৰেক্ষিত অনুষ্ঠিত হ’ব ৰাজ্যসভাৰ নিৰ্বাচন ।
উল্লেখ্য যে, বিৰেন্দ্ৰ প্ৰসাদ বৈশ্যক তৃতীয়বাৰৰ বাবে ৰাজ্যসভাৰ টিকট দিছে অগপই । বৈশ্য ২০০৮ চনৰ পৰা ২০১৪ চনলৈ ৰাজ্যসভাৰ সাংসদ হোৱাৰ লগতে ২০১৯ চনৰ জুন মাহত পুনৰ ৰাজ্যসভালৈ নিৰ্বাচিত হয় । একেদৰে ১৯৯৬ চনৰ লোকসভাৰ সাংসদ হিচাপেও নিৰ্বাচিত হৈছিল বিৰেন্দ্ৰ প্ৰসাদ বৈশ্য । বৈশ্যই মংগলদৈ লোকসভা সমষ্টিৰ পৰা সাংসদ হিচাপে নিৰ্বাচিত হৈ ১৯৯৬ চনৰ পৰা ১৯৯৮ চনৰ মাৰ্চ মাহলৈকে কেন্দ্ৰীয় তীখা আৰু খনিৰ মন্ত্ৰীৰ দায়িত্বও লাভ কৰিছিল ।
লগতে পঢ়ক : বিজেপিয়ে ঘোষণা কৰিলে ৰাজ্যসভা নিৰ্বাচনৰ প্ৰাৰ্থীৰ নাম…