আজি ভাৰত-পাকিস্তানৰ যুদ্ধবিৰতিৰ অন্তিম দিন! ইয়াৰ পাছত কি হ’ব?

ভাৰতীয় সেনা

ভাৰত আৰু পাকিস্তানৰ যুদ্ধবিৰতি আজি শেষ হ’ব নেকি? ১৪ মে’ত হোৱা DGMO পৰ্যায়ৰ আলোচনাত যুদ্ধবিৰতি ১৮ মে’লৈ বৃদ্ধি কৰাৰ চুক্তি হৈছিল নেকি? আজি পুনৰ দুয়োখন দেশৰ DGMOৰ মাজত বৈঠক হ’ব নেকি? এই প্ৰশ্নসমূহৰ উত্তৰ দিছে ভাৰতীয় সেনাই। সেনাই কয় যে, আজি দুয়োখন দেশৰ মাজত DGMO পৰ্যায়ৰ কোনো আলোচনাৰ দিন নাই। ১২ মে’ত DGMO-এ আলোচনা কৰা যুদ্ধবিৰতি অব্যাহত ৰখাৰ কথা ক’বলৈ গ’লে ইয়াৰ কোনো ম্যাদ উকলি যোৱাৰ তাৰিখ নাই।

এই বক্তব্য প্ৰদান কৰে উপ-প্ৰধানমন্ত্ৰীয়ে

পাকিস্তানৰ উপ-প্ৰধানমন্ত্ৰী ইছহাক দাৰে অলপতে ছিনেটত জনাইছে যে ১৪ মে’ত ভাৰত আৰু পাকিস্তানৰ সামৰিক অভিযানৰ সঞ্চালক প্ৰধান (ডিজিএমঅ’)ৰ মাজত হটলাইনত এক বাৰ্তালাপ হৈছিল, য’ত যুদ্ধবিৰতি বৃদ্ধিৰ বাবে এক চুক্তিত উপনীত হৈছিল। তেওঁ কয় যে ১০ মে’ত প্ৰথমবাৰৰ বাবে দুয়োখন দেশৰ ডিজিএমঅ’ৰ মাজত হটলাইনত কথা-বতৰা হৈছিল, য’ত যুদ্ধবিৰতি ১২ মে’লৈকে বৃদ্ধি কৰা হৈছিল।১২ মে’ত পুনৰ আলোচনা অনুষ্ঠিত হৈছিল আৰু ১৪ মে’লৈ বৃদ্ধি কৰা হৈছিল। ১৪ মে’ৰ আলোচনাত ১৮ মে’লৈ যুদ্ধবিৰতি বৃদ্ধি কৰাৰ বাবে এক চুক্তিত উপনীত হয়।

উপ-প্ৰধানমন্ত্ৰী ইছহাক দাৰে এক সাক্ষাৎকাৰৰ সময়ত কৈছিল যে যদি ভাৰত আৰু পাকিস্তানৰ মাজত দীৰ্ঘদিনীয়া সিন্ধু জল চুক্তিৰ বিবাদৰ সমাধান নহয় তেন্তে যুদ্ধবিৰতি চুক্তি বিপদত পৰিব পাৰে। সন্ত্ৰাসবাদক আশ্ৰয় দিয়া পাকিস্তানৰ বৈদেশিক মন্ত্ৰীগৰাকীয়ে ১৯৬০ চনৰ সিন্ধু জল চুক্তি স্থগিত ৰখাৰ ভাৰতৰ সিদ্ধান্তক প্ৰৰোচনা বুলি অভিহিত কৰি কয় যে যদি এই সমস্যা সমাধান নহয় তেন্তে ইয়াক Act Of War  বুলি গণ্য কৰা হ’ব পাৰে।

ইফালে সন্ত্ৰাসবাদৰ বিষয়ক লৈ বিশ্ব পৰ্যায়ত উন্মোচিত হৈছে পাকিস্তান, সেয়েহে দেশখনৰ প্ৰতিচ্ছবিৰ ওপৰত চাপ বাঢ়িছে। ইয়াৰ পাছতে কৌশলগত পদক্ষেপ গ্ৰহণ কৰি তেওঁলোকে হঠাতে যুদ্ধবিৰতিৰ কথাও ঘোষণা কৰে। এই সিদ্ধান্তই এইটোও ইংগিত দিয়ে যে পাকিস্তানে বৰ্তমান আন এক মুকলি যুদ্ধৰ পৰা আঁতৰি থাকিব বিচাৰিছে, বিশেষকৈ যি সময়ত ইয়াৰ আভ্যন্তৰীণ পৰিস্থিতিও অস্থিৰ হৈ আছে।