সঘনাই পাকিস্তান ভ্ৰমণ কৰা লোকে অসমক নেতৃত্ব দিব নোৱাৰে, গৌৰৱ গগৈক টাৰ্গেট কৰি আৰু কি ক’লে অমিত শ্বাহে ?

অমিত শ্বাহ

পঞ্চায়ত প্ৰতিনিধিৰ সমাৱেশত দিয়া ভাষণত প্ৰদেশ কংগ্ৰেছৰ সভাপতি গৌৰৱ গগৈক টাৰ্গেট কৰি লয় কেন্দ্ৰীয় গৃহমন্ত্ৰী অমিত শ্বাহে। এক প্ৰকাৰে গৌৰৱ গগৈক কটাক্ষ কৰি শ্বাহে কয় যে, সঘনাই পাকিস্তান ভ্ৰমণ কৰা লোকে অসমক নেতৃত্ব দিব নোৱাৰে। আপাত দৃষ্টিত পাকিস্তানৰ সৈতে প্ৰদেশ কংগ্ৰেছৰ সভাপতি গৌৰৱ গগৈৰ কথিত সম্পৰ্কৰ কথা উল্লেখ কৰে অমিত শ্বাহে।

শুকুৰবাৰে গুৱাহাটীৰ খানাপাৰা পশু চিকিৎসা মহাবিদ্যালয় খেলপথাৰত অনুষ্ঠিত ‘এন ডি এ পঞ্চায়ত প্ৰতিনিধি সন্মিলন’ত সম্বোধন কৰে অমিত শ্বাহে। ভাষণত অহা বছৰৰ মাৰ্চ-এপ্ৰিলত হ’বলগীয়া অসম বিধানসভা নিৰ্বাচনৰ বাবে ‘ৰণ শিঙা ’ বজাই অমিত শ্বাহে। একে সময়তে তেওঁ কয় যে, অনুপ্ৰৱেশকাৰী আৰু বেদখলকাৰীৰ প্ৰতি সহানুভূতি থকা নেতাই ৰাজ্যখনক প্ৰতিনিধিত্ব কৰিব নোৱাৰে।

তেওঁ কয় যে, মুখ্যমন্ত্ৰী নৰেন্দ্ৰ মোদীয়ে সমগ্ৰ দেশতে অপৰিসীম উন্নয়নমূলক কাম-কাজ কৰিছে আৰু অসমৰ মুখ্যমন্ত্ৰী হিমন্ত বিশ্ব শৰ্মাই সেই প্ৰবাহ ৰাজ্যৰ প্ৰতিটো ঘৰলৈ লৈ গৈছে। এই কামৰ আঁৰত অহা বছৰ বিজেপি নেতৃত্বাধীন এন ডি এয়ে একেৰাহে তৃতীয়বাৰৰ বাবে অসমত চৰকাৰ গঠন কৰিব বুলি দাবী কৰে অমিত শ্বাহে।

অনুপ্ৰৱেশকাৰীৰ পক্ষ লোৱা লোকে অসমক প্ৰতিনিধিত্ব কৰিব নোৱাৰে: অমিত শ্বাহ

বিৰোধী কংগ্ৰেছক সমালোচনা কৰি শ্বাহে কয় যে, অনুপ্ৰৱেশকাৰীৰ প্ৰতি সহানুভূতিশীল আৰু বেদখলক উৎসাহিত কৰা লোকে অসমক প্ৰতিনিধিত্ব কৰিব নোৱাৰে। গৌৰৱ গগৈক কটাক্ষ কৰি শ্বাহে কয় যে, “সঘনাই পাকিস্তান ভ্ৰমণ কৰা লোকে অসমক নেতৃত্ব দিব নোৱাৰে।”

উল্লেখ্য যে, পাকিস্তানৰ চোৰাংচোৱা সংস্থা আই এছ আইৰ সৈতে পত্নীৰ সম্পৰ্ক থকাৰ অভিযোগ উত্থাপন কৰি গৌৰৱ গগৈক অসমৰ মুখ্যমন্ত্ৰী আৰু বিজেপিয়ে সমালোচনা কৰিছিল । মুখ্যমন্ত্ৰী শৰ্মাই দাবী কৰিছিল যে, গগৈৰ ব্ৰিটিছ পত্নী এলিজাবেথ কলবাৰ্নে ১৯ বাৰ পাকিস্তান ভ্ৰমণ কৰিছিল।

অমিত শ্বাহে কয়, “আমাৰ হাজাৰ হাজাৰ বিঘা মাটি অনুপ্ৰৱেশকাৰীয়ে বেদখল কৰিলে। বিজেপি চৰকাৰে সকলো ঠাইৰ পৰা বেদখল মুক্ত কৰাৰ অভিযান আৰম্ভ কৰিছে, কিন্তু গৌৰৱ গগৈয়ে ইয়াৰ বিৰোধিতা কৰিছে… অসম চৰকাৰে ১,২৯,৫৪৮ একৰ মাটি অনুপ্ৰৱেশকাৰীৰ বেদখলৰ পৰা মুক্ত কৰিলে।” একে সময়তে বিজেপিয়ে সত্ৰসমূহক ৰক্ষা কৰিছে বুলি দাবী কৰে কেন্দ্ৰীয় গৃহমন্ত্ৰীগৰাকীয়ে।