আপোনাৰ এনে অভ্যাস হৈ পৰিব পাৰে ডায়েবেটিছ বৃদ্ধিৰ কাৰণ

কেৱল মিঠাই খালেহে যে ডায়েবেটিছ বাঢ়ে, তেনে নহয়। আমাৰ দৈনন্দিন কিছুমান অভ্যাসো দেহত ডায়েবেটিছ বৃদ্ধিৰ কাৰণ হ’ব পাৰে।

পৰ্যাপ্ত টোপনিৰ অভাৱত শৰীৰৰ ইনচুলিনৰ প্ৰতি সংবেদনশীলতা হ্ৰাস পায়। যদি আপুনি ডায়েবেটিছ নিয়ন্ত্ৰণত ৰাখিব বিচাৰে, প্ৰতিদিনে পৰ্যাপ্ত সময় শুবলৈ চেষ্টা কৰক।

মানসিক চাপৰ সময়ত শৰীৰে কৰ্টিছল হৰম’ন নিৰ্গত কৰে, ই তেজত গ্লুক’জৰ মাত্ৰা বৃদ্ধি কৰিব পাৰে। গতিকে অত্যধিক মানসিক চাপ লোৱাৰ পৰা বিৰত থাকক।

শৰীৰত পানী কম হ’লে তেজত গ্লুক’জৰ মাত্ৰা বৃদ্ধি পায়। সেয়ে দেহ হাইড্ৰেট কৰি ৰাখিবলৈ দিনটোত পৰ্যাপ্ত পৰিমাণে পানী খোৱা উচিত।

ষ্টেৰইড বা কিছুমান এণ্টিডিপ্ৰেছন ঔষধে তেজৰ চেনিৰ নিয়ন্ত্ৰণত ব্যাঘাত জন্মাব পাৰে। গতিকে যিকোনো ঔষধ গ্ৰহণৰ পূৰ্বে চিকিৎসকৰ পৰা ভালদৰে পৰামৰ্শ লওক।

সময়মতে খাদ্য নাখালে যকৃতে জমা হোৱা গ্লুক’জ নিৰ্গত কৰে। গতিকে নিৰ্দিষ্ট সময়ত ফাইবাৰ, প্ৰটিন আৰু স্বাস্থ্যকৰ কাৰ্বহাইড্ৰেটযুক্ত খাদ্য গ্ৰহণ কৰক।

বহু সময়ত প্ৰচেছড খাদ্যৰ পেকেটৰ ওপৰত স্বাস্থ্যকৰ বুলি লিখা হয়, কিন্তু ইয়াত বহু পৰিমাণে কৃত্ৰিম চেনি থাকে। গতিকে প্ৰচেছড খাদ্য গ্ৰহণৰ সময়ত সাৱধান হওক।